الإثنين، 17 ديسمبر 2018

الدارجة يا شعب الله القاعد

صلاح باديس

بن غبريط قالتلهم ندخلوا الدارجة فالابتدائي باش التلاميذ فالسنة الأولى ما يصرالهمش “شوك” مع العربية الفصحى، يعني نفهموهم شوية شوية، على خاطر الذراري الصغار ماشي موالفين الكُل بالعربية الفصحى، ومشي الكُل يشوفوا “طيور الجنّة” والأغلبية تاعهم يهدروا الدارجة وكي يدخلوا للمسيد يصطدموا بالعربية وسيرتو بعض المعلّمين تاع الابتدائي الجايحين اللّي يسيفوا عليهم الهدرة بالفصحى، شوف ذيك الجياحة وذاك الغباء!

أنا كشخص يكتب بالدارجة ويهدرها كل يوم ويكتب بيها كرونيك كل سمانة، وكشخص كتب في هذا الموضوع بالعربية الفصحى مقالات على الدارجة الدزيرية واللهجات تاعها، وعمل محاولات في تفسير بعض الكلمات تاعنا، عندي راي خاص بيا يقول أنّه الدارجة والاعتراف بها حاجة ضرورية اليوم بصّح في نفس الوقت رأيي ما يوافقش رأي النّاس المعرّبة واللّي راهي تتفلسف وتقول بلّي العربية من ثوابت الوطن والدين، وتشوف بلّي الدارجة مؤامرة ضد العربية والاسلام، يعني الواحد كي يشوفف هكا ما يصيب ما يقول غير أنّهم ناس حبسوا فالسبعينيات وراهُم يحكوا على “وطن” غير اللّي رانا عايشين فيه… والنّاس الثانيين هوما ناس غالباً فرانكوفون راهم يشوفوا بلّي الدارجة لازم تولّي في بلاصة العربية وبلّي هذا تطوّر للهجات المحلية كيما صرا في القرون الوسطى مع اللاتينية اللي كانت مهيمنة ومهيمنة معاها الكنيسة ومن بعد تمردت عليها اللّهجات المحلية اللّي اليوم راهي لُغات عالمية وكبرى كيما الفرنسي والايطالي والاسباني… يعني كيما رانا نشوفوا بلي كي هذو كي هذو راهم في وضعية تسلّل، على خاطر هذو الزوج آراء راهُم بخلفية سياسية وايديولوجية، واحد جاي يقولك ثوابت الوطن؟ يا انسان ثوابت الوطن بواش كاين فالواقع مشي بواش كاين فالورقة… النّاس راهي تدخل ولادها للمسيد يشيبوا معاهم على خاطر الأساتذة “الحابسين” في عوض يستعملوا الدارجة كـ”جسر” بين العالم اللّي جاو منه الأولاد والكُتب، في عوض يعملوا هكا، راهُم يروحوا يهدروا معاهم بالعربية الفصحى ديراكت حتى يعقدوهم من جهتها ويصمطوهالهُم… واحد يقولك لازم الدارجة تولّي هي اللّغة الرسمية ويحكيلي على اللاتينية؟ يا انسان يا فاهم دير قبل قواعد وتقاليد كتابة بالدارجة واحكيها نتا قبل في حياتك اليومية ما دامك محروق عليها هكا كامل، ولاّ نتا كيما خوك تع الثوابت الوطنية آخذ موقف من الدارجة بخلفية ايديولوجية وراك حاب تصفي حسابات سياسية بالدارجة هذي؟ يعني هو يقول مؤامرة على العربية الفصحى ونتا تقول العربية مؤامرة على الدارجة!

يعني نشوفوا بلّي النّاس هذو الكُل آخر همهم الدارجة وآخر همهم التلاميذ اللّي راهُم يدخلوا يقراو… والزوج أنواع هذو عندهم عُقدة تجاه احدى اللغتين، وجميع واحد عندُه عُقدة تُجاه “أي ” لغة هو بنادم ما يليقش يحكي في مواضيع مماثلة، وديجا كل النقاش اللّي راهو يصرا هو نقاش لازم يكون وتأخّر بزاف، بصح معليش نديروه ضركا، ولازم يصرا على قطاعات أوسع من المجتمع الواقعي والافتراضي… بصّح لازم الكلمة الحقيقية في موضوع الدارجة ياخدوها أخصائيين وأكاديميين مشي ناس قواودة يتاجروا بالدين وبالايديولوجيا لأجل مصالحهم الخاصة.

 

..يتبع

إضافة تعليق

تعليق (تعليقات)

شاهد أيضاً

مع نورالدين عبّة.. في رحلة الشّعر والمسرح والحياة

بتاريخ 9 مارس 1979، نشر الصّحافي والقاصّ مرزاق بقطاش(1945)، في صحيفة «المجاهد الأسبوعي»، مقابلة، نظنّها …

الدّمية «باربي» تلبس الحجاب؟!

باربي، هي واحدة من أكثر الدّمى شهرة، في العالم، بيعت منها أكثر من مليار ونصف …