الإثنين، 21 سبتمبر 2020

ما تصومش لنفحة وما تتفلسفش

صلاح باديس

قبل رمضان، كاين شي عباد تحب «مرميطة» تقوللهم راكم كثرتو على ما وصاوكُم.
1- واحد السيّد كان يخدم فالإذاعة من بعد خرج، قالك ما يحبوش آرائي السياسية.. من بعد راح يخدم في برنامج، وهذاك البرنامج حبسوه ما عندوش بزاف، زاد دارلنا فيها صحافي واعر وينادي بحرية التعبير.. بدا يخدم ماعندوش بزاف في راديو فتحه واحد مجمع إعلامي فيه جرنان وقناة تلفزيونية وجيش من الصحافيين يخدمو بعقلية التقرعيج.. باش يخرج علينا بتصاور تاع آخر ضيوفه واللّي هو: حمَداش، ويزيد يكتب فوق التصاوَر (زعما زعما تصريح ناري وخطير): حمداش يقول بأنه لو كان رئيساً للجمهورية سيفتح سفارة لداعش في الجزائر لكن بشرط! بابابابابابا واعرين نتوما!.. علاش تفتحلهم سفارة؟ راهُم عايشين في وسط الناس. وبالنسبة للصحافي اللّي جابو، واللّي قاعد يسوطي من بلاصة لبلاصة، يجي نهار وتشوفوه يطلع الفوق ويقولك: «باسمي وباسم كل الشباب التقدّمي والمدافع عن الحرية».. نهار تديرها يا السي خونا أنا نكون قاعد تمّا ونتيري عليك بواش جا قُدامي.
2- صفحة تاع فايسبوك عندها قريب مليون متابع، واسمها هو أشهر شِعار دزيري يعَيطو بيه الدزيرية فالشارع.. الصفحة هذي شادينها جماعة عندهم زيڨو في راسهم، ويلعبو بعقول النّاس اللي تبّع فيهم، واللي «أغلبهم» ذراري يقراو فالليسي ولاّ فالجامعة.. يلعبو بالدين وحاطّين رواحهم «ظلّ اللّه على الأرض» كيما كانوا العثمانيين يسمّو السلطان.. هذي الصفحة راهي أكثر من داعش.. وتزايد على النّاس في وطنيتهم ودايرة دزاير هذي تاعهم بَرْكْ.. كيما اللّي راهُم الفوق يشوفوا دزاير تاعهُم بَرْكْ.. واللّي يضَحكْ تصيب ساعات الصفحة هذي دايرة صورة مثلاً ومعلقة عليها بكلام جد متطرّف، من قبيل أنّه دزاير هذي ولاّت بلاد كفار، وتروح للتعليقات تصيب واحد مسمّي روحه مثلا «كوكو مادريستا» ومعمّر البروفيل بتصاور تع الـUK وداير تعليق (فيه 800 لايك) يقوللهم: ديجا أصلا حنا ما نعترفو بوالو من هذي الدنيا لازم نديرو دولة إسلامية ونقتلو الباقي.
3- أخيراً، عندنا قراءنا الأعزاء اللّي ما عجبهمش الحال كي درنا شعار «صيامكم نفحة».. يعني فهموها بلّي رايحين يصوموا لينا حنا، وقالك حنا نصوموا لربي مشي ليكم ونتوما بيكم وعليكم.. اللّه لا صُمت آسيدي، مليح هكا؟ ناس موسوسة في راسها، تفهم النُقص في كلّش. شكون قالك صوم لنفحة؟ الحاصول والمفيد أيها الشعب الأبيّ المُرائي، صوم ما تصومش، نوض على الستة تاع الصباح ولا تاع العشية، أسهر ألعب دومين ولا كارطة، دير تصويرة فالفايسبوك بلّي رمضان كريم وتاغي فيها الغاشي اللّي عندك، كول بوراك ولاّ بريك بالبيض.. ما راكش رايح تزيد ولا تنقّص من عند النّاس وأخرج شوية من الفايسبوك وروح دير الخير – اذا حبيت – برّا. شبعتونا خرطي ياخي زواوش قرمود.

إضافة تعليق

تعليق (تعليقات)

شاهد أيضاً

مع نورالدين عبّة.. في رحلة الشّعر والمسرح والحياة

بتاريخ 9 مارس 1979، نشر الصّحافي والقاصّ مرزاق بقطاش(1945)، في صحيفة «المجاهد الأسبوعي»، مقابلة، نظنّها …

الدّمية «باربي» تلبس الحجاب؟!

باربي، هي واحدة من أكثر الدّمى شهرة، في العالم، بيعت منها أكثر من مليار ونصف …