الإثنين، 21 سبتمبر 2020

لاقباني، لادرويش، لاباك، لاجد مواليكم

صلاح باديس

غدوة يخلاص الباك وتخلاص لومبيونس وبن غبريط «تتنفس الصعداء». هبلونا! سمانة ڨع وهوما يسبوا فالتلميذ الدزيري وحايرين كيفاش ولاّيغش باﻟ3G.. يعني والله غير جياحة كبيرة قاعد نشوف فيها فالجرانن وعلى التلفزيون.. وما زال الكاسيطة القديمة اللّي من نهار جوّزت الباك وأنا نسمع فيها، تاع التلميذ الدزيري ما عندوش مستوى، بلاما يحوسوا يفهموا علاش ما عندوش مستوى، ووين راه المُشكل!

قبل ما نبدا نهدر، نحب نقول للصحفيين تاع الشروق تي في والنهار تي في اللّي عيّاونا بالتحقيقات تاعهم من قدّام مراكز الامتحانات، كي يكون عندكم مستوى أحكوا على المستوى..

وبالنسبة للنّاس اللّي جوزت الباك وللحكومة وللغاشي تاع دزاير:

هاو حاجة باينة يغش ونتوما منظومتكم التعليمية تعفنت وما حبيتوش تحشموا.

باينة يغش ونتوما نهار تعربوا ونهار تفرنسوا ونهار ما علاباليش واش..

باينة رايح يغش ونتوما درتولنا بن بوزيد وزير قريب عشرين سنة، وخرّج أجيال تاع تلاميذ مسوطيين في راسهم..

باينة رايح يغش التلميذ هذا ونتوما والأساتذة تاعكُم (ما عدا البعض) يحبوا اللّي يحفظ واللّي يحاول يدير مجهود يعطولو زوج زيرُوات..

باينة رايح يغش وانتوما اللّي فتحتو الجامعة لكل من هبّّ ودبّ، ومن وقت بن بلّة حڨرتو المِهن الصغيرة والخدمات تاع اليد، والنتيجة رانا نشوفو فيها اليوم، غاشي (ماشي شعب) يتكبّر على كلّش ويتڨوعر على كلّش، ويحب المظاهر..

باينة يغش ونتوما ما تفرقّوش بين نزار قباني ومحمود درويش!

باينة رايح يغش ونتوما تستعملو فالباك كوسيلة تهدئة شعبية، نعطوكم الباك وريحوا عاقلين..

باينة رايح يغش ونتوما في عوض تعاقبوا اللّي غش، تظلوا تقولو له من الابتدائي: من غشّنا فليس منّا. غير بالهدرة برك..

باينة رايح يغش ونتوما ما حبيتوش تفيقوا على رواحكم وتتعاملوا مع الأستاذ على أنّه موظف لازم يكون مثقف ومحترم وعنده كل حقوقه ويدير«كل واجباته» باش يقرّي النّاس.. وما راهوش رسول والخرطي هذاك، ما نحبش نزيد نسمع حكاية كاد المعلّم أن يكون رسولاً، على خاطر تعيي كيما نتوما وكيما الغاشي تع دزاير اللّي يقولك بكري كانوا يخافوا المعلم، يعني يا يخافوه يا يضربوه في دزاير؟ على خاطر حاجة ما راهي مبنية على أساس عقلاني.. حنا غارقين فالخرا وهوما يشدوا في قشور الأشياء ويزيدوا عليها.. ويدخلوا الدّين في كُلّش، ولمعلوماتكم برك، اللّي يحكي بزاف على حاجة يعني راهو مفتقد ليها، وطبقوا هذا على النّاس اللّي تحكي على الدين صبحة وعشية..

باينة رايح يغش وحنا ما قدرناش نفوتو«عقلية العالم الثالث» في راسنا.. كيما هذاك البقّار اللّي يشري طونوبيل تاع مليار ويقعُد يدور بيها في حومته.. يجيك واحد يستعمل الـ3G باش يغش فالباك..

باينة رايح يغش ما دام السيّد راهو يفكّر بلّي لو كان يصلّي يامات، الباك راح يجيبو! أمّة اللّي عايشة كي شغُل كونطابل تحسب فالحسنات والسيئات وتزيد تنافق تحت الطابلة ما تستنى منها والو..

وأخيراً، نحب نزيد نقول للنّاس اللّي رايحة تصحح زَيْروا الدعوة فالنقاط يرحم بوكم، راهو غاشي كحل فالجامعات، خلّو شوية النّاس تفيق واللّي ما جابش الباك ماشي نهاية الدنيا وما كان لاه يبداو يدوخوا وينتحروا ويديرولنا فالفيلمات، سيرتو البنات، اللّي ما جابوش يتعلّم حرفة ولايدير ستاج ولا يعاودُه.. يخلّوا غير النّاس اللّي تستاهل تطلع كاش.

وما كان حتى حاجة مهمّة فالجامعة، على خاطر تطلعوا تشبعوا حشيش وتحراش وراتراباج.. وكيما المنظومة تعيي خرجتلنا عباد يعيوا ووالديهم كثر منهم، كيما هذاك اللّي يعاير في بن غبريط، على خاطر بنته جاها واعر موضوع الرياضيات.. تباً.

إضافة تعليق

تعليق (تعليقات)

شاهد أيضاً

مع نورالدين عبّة.. في رحلة الشّعر والمسرح والحياة

بتاريخ 9 مارس 1979، نشر الصّحافي والقاصّ مرزاق بقطاش(1945)، في صحيفة «المجاهد الأسبوعي»، مقابلة، نظنّها …

الدّمية «باربي» تلبس الحجاب؟!

باربي، هي واحدة من أكثر الدّمى شهرة، في العالم، بيعت منها أكثر من مليار ونصف …