الجمعة، 25 سبتمبر 2020

علاش ميسيو «س» يخاف من الميني؟

أولاً، راني نوجّه كلامي لجميع واحد يأمّن في مقولة:«حريتي تنتهي عند حرية الغير»، هذي كذبة كبيرة.. ما كانش منها.. خُرطي.. ونسمّوه مثلا: ميسيو «س»، الحُرية يا ميسيو «س» نبنوها كيف كيف، ما كانش حدود تاعي وتاعك، وإذا أنت راسك مغلوق وحاب تلعبها متحرّر روح عاود أقرا، واللّي ما عجبوش الكلام كاين التعليقات أسفل الصفحة..

ميسيو «س» هذا والف من وقت (سوق الفلاح) والحزب الواحد أنّه النّاس الكُل تشبه له، يعني باختصار ما يتقبّلش المُختلف مهما كان، بصّح مع الوقت تبدلت شوية الدنيا وحتى دزاير تبدلت شوية، بصّح ميسيو «س» ما تبدّلش، خاصة مع المرأة، قعد بعقلية الجاهلية ووأد البنات.. المرأة عيب/ عورة/ مورصو تاع لحم، إلخ. إذا أخته قالك خط أحمر، وبنات الناس يركبهم نورمال، وهذا واش رانا نشوفو فيه اليوم في الفايسبوك والتحراش تاع «كن رجلا ولا تدع نساءك…» كي شغُل ضركا هذو «نساءك» ماتِريال شراه بدراهمه ولازم يغطيهُم ولا لازم يعرّيهُم، يعني شيء..

ميسيو «س» باختصار مُشكلته ماشي مع المرأة، مُشكلته مع اللّحم، على خاطر ميسيو «س» يشوف أليكسي تِكساس وما شابهها من ممثلات البورنو ويخرج للطريق يحب يعلّم بنات الناس الدين، ويحب يعلمهم الحشمة ويبدا يتفلسف، ميسيو «س» يبرّر واش يدير بأنّه «ما يقدرش يحكم في روحه كي يشوف وحدة لابسة الميني»، ويزيد يتفلسف بلّي هو مُسلم وهذي بلاد مسلمة، يعني نورمال هو يهبط السروال ويبيّن البوكسر على خاطر «ذكر» بصّح غير يشوف يا ربّي زوج سنتمترات تاع لحم يهيج ويدير حالة..

ميسيو «س» يحلم يقطع البحر ويروح لروما.. ولاّ السوّيد ويقول لبنت بلاده أنتِ موسطاشة، وكي يروح لبلاد النور وين الناس (حسب تعبيراته ومصطلحاته) تمشي عريانة نورمال، يشد روحه ويمشي مهبّط راسُه ما يقولش ياو راكم هيجتوني، على خاطريحب يلعبها كوول ومتحضّر، وداير في راسُه بلّي النّاس ثما «باردين» على خاطر يمشون نورمال ما يطلعش منهم الدخان كيما هو..

ميسيو «س» راهو وليد ثقافة ذكورية قديمة بزاف، ثقافة ذكورية تشوف فالراجل اللّي تزيد عندُه طفلة بلّي راهي جاتو بليّة مشي إنسان كيفه كيف الراجل، ميسيو «س» تربّى بلّي هو لو كان يثقب الاوزون يقعد لاغُبار عليه ولازم أخته يبول عليها ويضربها باش يحس روحه «ذكر» يعني كي شغُل كيما السردوك كي يبدا يلعبها قدام الدجاج ويطلع يصيح..

فالأخير، نزيد نقول المُشكل تع ميسيو «س» راهو مع اللحم ونزيدو نفهمو بزاف حاجات كي نشوفو إحصاءات غوغل 2014 وين تصنّف بلدان كيما دزاير… مصر… السعودية في قائمة الأكثر زيارة للمواقع الإباحية.. رانا عايشين في وسط مجتمع صعيب، إزدواجية المعايير والنفاق قتلوه.. والسرادك دايرين فيه حالة..

إضافة تعليق

تعليق (تعليقات)

شاهد أيضاً

مع نورالدين عبّة.. في رحلة الشّعر والمسرح والحياة

بتاريخ 9 مارس 1979، نشر الصّحافي والقاصّ مرزاق بقطاش(1945)، في صحيفة «المجاهد الأسبوعي»، مقابلة، نظنّها …

الدّمية «باربي» تلبس الحجاب؟!

باربي، هي واحدة من أكثر الدّمى شهرة، في العالم، بيعت منها أكثر من مليار ونصف …