الإثنين، 21 سبتمبر 2020

دزاير فيها دراهم؟

 

الحاجة الأولى اللّي حاب نحكي عليها هي بلّي السيدة وزيرة الثقافة، راهي جاوبتني وهدرت في الأخبار تاع الثمنية وقالت بلّي خلاص القانون جاز وراهي فرحانة ومن اليوم لازم نكتبو كتُب «ناس ملاح»، يعني اللّي يكتب من اليوم غير يريّح عاقل ولاّ ما ينشرولوش! برافو مدام نادية، راكي دخلتي للتاريخ بهذا القانون..

ضركا نهدرو على السّي علي حداد والحَسْ الكبير اللّي دارو الفيديو تاعو في ندوة صحفية مع الشناوة وعلى الشناوة والاستثمار في دزاير، أنا ما نحكيش على واش قال على الشناوة اللّي يطلقوا ويجو يتزوجوا هنا، ولاّ كيما فهموا النّاس بلّي دزاير فيها نسا للشناوة.. دبّر راسك يا حداد قول واش حبّيت، كل واحد يعس قدّام باب دارُه وخلاص، وكيما الدزيري يحلم يتزوّج بروسية، لربما – وهذي دنيا، والدنيا واعرة – الشِنوي يحلم يحرق لدزاير ويتزوّج دزيرية! أنا نحكي على الكلمة الأولى: ندعوكُم تجو لدزاير تستثمرو، دزاير فيها بزاف دراهم..

أيا مليح آسيدي هذي الدرجة الأولى ورانا عرفنا بلّي دزاير فيها دراهم كبار، وما زالت «عذراء» وجنة للمستثمرين، إلخ.  قولوا لنا آسيدي بلّي فيها دراهم هَاوْ!!! خلّو النّاس دير شوية دراهم، حنا ما نعرفوش، عُمرُه ما جا واحد في التلفزيون ولاّ في جُرنان وقال لنا دزاير فيها دراهم وأرواحو تخدمو. يعني نتا يا السي حدّاد راك تعرض في الشناوة وخاوتك الدزيرية ما تعرضهُمش؟ يقرقبوا شوية، وراك تعرف كي تولّي كاينة الخدمة النّاس تولّي تتكوّن وتدخل تقرا، بصّح شغُل من جهة واحد يقول لنا استهلكوا جزايري ومن جهة نتا راك تعرض في الشناوة!

أنا عجبتني هذي تاع دزاير فيها دراهم، ويزيد يقولك «وفيها دراهم كبار»! شوية سيريو ضركا، ما تجيبولناش الشناوة، على خاطر هوما غاشي يجو بيهم بماكلتهم، بفراشهم، بنساهم.. زلاميت ما يشريهاش عليك (ماشي الزلاميت رانا نجيبو فيها من عندهم؟) شوفو لنا ناس تاكل وتوكّل، خيرلالا؟ يعني يستثمر وتكون اليد العاملة دزيرية، وراهي البلاد فيها قريب 2,5 مليون كلم مربّع، شوفوا كاش بلاصة مليحة وديروا فيها منطقة صناعية.

ولاّ نقولك..

الخليفة مَشي راهو هنا؟ يحاكموا فيه. أيا نشوفوه يحكيلنا هو واش صار لُه، مشي يسمّوه «غولدن بوي» زعما؟ أيّا هو يحكيلنا على الدراهم تع دزاير.

ولاّ هذا ثاني ما نكتبوش عليه سيدتي الوزيرة؟

 

إضافة تعليق

تعليق (تعليقات)

شاهد أيضاً

مع نورالدين عبّة.. في رحلة الشّعر والمسرح والحياة

بتاريخ 9 مارس 1979، نشر الصّحافي والقاصّ مرزاق بقطاش(1945)، في صحيفة «المجاهد الأسبوعي»، مقابلة، نظنّها …

الدّمية «باربي» تلبس الحجاب؟!

باربي، هي واحدة من أكثر الدّمى شهرة، في العالم، بيعت منها أكثر من مليار ونصف …