الخميس، 24 أكتوبر 2019

البيرة عربية والويسكي ڨاوري

الشاب خالد سرق ديدي للشاب رابح وغنّاها ودار بيها حالة.. كيما حكاية الفايسبوك: مارك زوكربيرغ سرق الفكرة لزوج خاوة وطوّرها ودار بيها حالة، وبدّل بيها الدنيا هذي.. على بالنا بلّي الغنا تاع خالد يتشابه والكلام تاع الغنا «بيزار» بصّح نورمال: واي.. واي.. ستيك.. ستيك.. من ذيك العام. الجيل اللّي يشفى على ديدي ما يشفاش على غنا خالد القديم كيما غُنية «البيرة عربية والويسكي ڨاوري» وما يشفاوش نهار كانت البيرة و«الديفان» يتباعوا في سوق الفلاّح.. خبّاو عليهم، ما حكاولهُمش..
ضركا مرميطة تحب تقول حاجة صغيرة، تحب تضبط المصطلحات باش ما نولّوش كيما الشاب خالد نهدرو برك! الشراب راهو يتباع في كل بلاصة، صح مخبيين ويفتحوا نص باب وفي الظلمة.. بصّح راهو يتباع وهكّا يتباع كثر «كل ممنوع مرغوب فيه».. زيد يا بوزيد، واش معناها كي واحد زعما يقرا في الجامعة وفاهم شوية يجي يقولك «هذا بلد مُسلم ما نقبلوش يتباع فيه الشراب»! ما تبهدلناش، داركم صرفوا عليك دراهم باش قريت وما تعرفش التاريخ والمصطلحات؟ نولّو كيما نتا آسيدي ونسألوك: «أعطينا بلد مسلم ما فيهش خمّارات ولاّ حانات ولاّ بار، ولاّ كيما حبيت تسمّي؟» أبدا من السعودية ونتا جاي.. الفكرة ما راهيش في المنع ولاّ في السماح، الفكرة راهي في ناس ينافقوا، كي تمشي في الطريق تشبع قراعي خضورة وكانيطات بيرة مرميين كثر من قراعي تع الما..
الفكرة راهي في ناس تخاف تخرج للواقع! ناس تفضل أنها تعيش في الظّل، إيه خلّي يبيعوا الشراب كيما يحبوا بصّح المهم ما تحكوش عليهم في التلفزيون، خلّي دزاير يكونوا فيها مثليين ويغنوا في الكباريات ونسمعولهم الغنا تاعهم بصّح ما تحكوش عليهم في الصحافة، الناس هذي تحب تغطي الشمس بالغربال وجوابهم الوحيد بلّي حنا بلد مُسلم، يعني يشوف الظاهرة بعينيه بصّح ما يقبلش النّاس تحكي عليها وتناقشها..
النفاق هذا تاع الحاجة يديروها بالتخبية وقدام الغاشي يقلبو الفيستا يعني رانا فيما قبل التاريخ، كيما اللّي يخرج مع طفلة من بعد يقولولها أنتِ بيك وعليك ومشي بنت فاميليا وأنا راجل! هذا واحد معقّد وموَسوس وما يتحمّلش مسؤوليته، يعني طفل تاع 5 سنين من النرويج ولاّ السويد خير منه.

إضافة تعليق

تعليق (تعليقات)

شاهد أيضاً

مع نورالدين عبّة.. في رحلة الشّعر والمسرح والحياة

بتاريخ 9 مارس 1979، نشر الصّحافي والقاصّ مرزاق بقطاش(1945)، في صحيفة «المجاهد الأسبوعي»، مقابلة، نظنّها …

الدّمية «باربي» تلبس الحجاب؟!

باربي، هي واحدة من أكثر الدّمى شهرة، في العالم، بيعت منها أكثر من مليار ونصف …

اترك تعليقاً

لن يتم نشر عنوان بريدك الإلكتروني.