الخميس، 24 أكتوبر 2019

روري في بلاد الزُرناجية

البارح يا سيدي، دزاير كانت زاهيّة! ڨع هدروا.. اللّي كانت عندُه حاجة في قلبه خرجها وهدرها.. كي هذوك اللّي جابولهم شوية غاشي في صالة، ولاّ اللّي خرجوا برّا.

الفايدة والحاصول روري اليوم عندها ما تمَنْشر..

أيا مالا، قالك نخرجوا نديرو مسيرة في ذكرى تأميم المحروقات«24 فيفري»، مَشي غير في العاصمة بصّح في دزاير ڨع. المحروقات اللّي جات تنفع ياك زادت كَملت على الحالة. خرجوا جماعة المعارضة زعما وخرجوا معاهم الشُرطة! لالا! ما خرجوش كيف كيف، أفهموني!!! هَذو خرجوا زعما «كونتر – بوفوار»، ولوخرين خرجوا يعسّوا على الزُرناجية وأصحَاب البارود اللّي زعما فرحانين بذكرى التأميم، وقعدوا كي العادة طع طع طع! ويبندروا، يعني فولكلور «مُفرغ من المعنى»، وبالطّريقة اللّي داروه بيها ما تأمنش اللّي يقلك هذا تراث شعبي، الڨنين..الڨنين.. الڨنين..! كيما قالولنا «درنالهم الطايحة» وأمّمنا المحروقات.. وكيما قالولنا بزاف حاجات.

النّاس ڨع شافت ولاّ سمعت بواش صرا، بصّح روري كي العادة عجبوها شي حاجات حبّت تكتبهم للتّاريخ، وفي كتاب التاريخ اللّي قرات فيه وما قالولهاش شكون قتل عبّان رمضان ولا قالولها واش صرا في التّسعينات، حبَت تكتب حاجات خفاف:

  • سلال يعيّط ويقول «ما قدروش يحركوها في الشّمال راحو لعين صالح.. ما تمشيش في الجنوب ما تمشيــــــش». هي شوف هذوك ناس خايفين على شوية تع الما اللّي عندهم بالمختصر ما راهُمش ساكنين في «نادي البلّوط» وعندهم دراهم في سويسرا، وبالنسبة لتمشي ولاّ ما تمشيش.. رانا قاعدين، واحد ما يمشي في البلاد من بكري يعني.
  • سعيداني واللّه ما حق عليك تحرڨ لويزة حنّون، مسكينة ما راحتش أصلاُ للحفّافة، هي هدرت البارح وقالت نفس الهدرة تاعك بصّح برك ما سبتش روحها.
  • عمّار غول كان قاعد واحد قدّامك لابس «كالباك» شابو تع الروس يعني، جابلي ربي شُفته خطرة في «نسمة تي. في» عند الطّيب في «جاك المرسول»؟
  • علي بن فليس تدير مسيرة بالڨارد – كور هكذا؟؟ خاوتك يرفدوا فيهم وأنت بالكتاف..!!
  • مقري وجيلالي سفيان طلعتو للبالكون تاع الأرسيدي في ديدوش مراد ودرتو بيديكُم «باي! باي»، حبيت نعرف لشكون برك!

كي كملت روري الكتابة غلقت الكتاب تاع التاريخ، وعلى الغلاف كان كاين بن مهيدي يديه مسلسلين وهو يضحك.. ضحكتله ورقدت.

إضافة تعليق

تعليق (تعليقات)

شاهد أيضاً

مع نورالدين عبّة.. في رحلة الشّعر والمسرح والحياة

بتاريخ 9 مارس 1979، نشر الصّحافي والقاصّ مرزاق بقطاش(1945)، في صحيفة «المجاهد الأسبوعي»، مقابلة، نظنّها …

الدّمية «باربي» تلبس الحجاب؟!

باربي، هي واحدة من أكثر الدّمى شهرة، في العالم، بيعت منها أكثر من مليار ونصف …

اترك تعليقاً

لن يتم نشر عنوان بريدك الإلكتروني.