الخميس، 24 أكتوبر 2019

قلبي وقلبَك يا حَدّة مربوطين بالشوينڨوم

اليوم نحكو على الحب، واللّي يشوف بلّي الحُب حاجة تع حلاّبين ولاّ حاجة جايحة، يا سيدي ما يكملش يقرا. ما نزعفو حتّى واحد..

علاش نحكو على الحُب؟

على خاطر واحد ما يحكي عليه في دزاير. نُص يعشقوا ويخبّوا، والنُص لاخُر يتمسخروا ويعايروا النُص الأول يقولولهم: حلاّبين! والحلاّب حسب تعريف مجلة «نفحة» هو شخص آخر. لحقنا وقت مع الجيل المولود في التسعينات وين اللّي يقول أنا نحب، كي شغُل بال تحته وراهو يمشي برّا.

أيا أسيدي زعما نديرو سؤال: علاش ما يجيناش كاش واحد لابس كوستيم وداير موسطاش ولاّ مَشي داير موسطاش كيما عمارة بن يونس (مثلاً) ويقول: يا شعب راني نحبكم! مَاشي نعل بو اللّي ما يحبناش؟ يقول: أنا نحبكم ونتوما عِباد مَاشي غاشي.. نقوللكم علاش.. ما يقدرووووش! «روري» تقول: «على خاطر ما حبّوهمش كي كانوا صغار!»

كاينة حاجة تاني، في الجوامع مثلاً يطلع الإمام فوق المنبر ويقول للمُصلّين: حبّوا نسائكم! زعما ينسى كاش جمعة وما يقولش هذيك الدخلة والخرجة اللّي يعاودهم دايماً، ويقول: أحسنوا إليهن، أحبوهن. هي صح تخلع هكا مع الأول بصّح مع الوقت يوالفو النّاس. أيا نتخيلو واحد هكا عُمره ما قاللها نحبك! يبدا يتعصر، ويتعصر، ويتعصر شغُل رايح يموت.. نـ… نحـ .. نعل بوووووك، ويبدا يبكي، وهي تقولُه لالا نحبك، وهو يعيط: ما نقدرش!

راني نحرّش، على بالي بلّي كاين ناس تعرف تحب، بصّح حنا تعلمنا الدنيا بالمقلوب نشوفو لنُص الكاس الفارغ دايماً. وزيد من جهة بن بوزيد واللّي كيما هو ضيعوا النّاس، لا تربية لا تعليم.. لا حُبْ! إيه نورمال كانوا قادرين يقرّوا الحُب في المسِيد وما يعايروش واحد كي يشد «زميلته» من يدها.

«روري» نهار السبت اللي فات شافت النّاس اللّي كانوا يتمسخروا بالسان- فالنتان لبسوا الأحمر وشراو نونورسات وخرجوا، روري شرات لروحها شوكولا.. وفي اللّيل قبل ما ترقُد، شافت سميرة براهمية، اللّي غنّات عندها شحال غنا شباب بزاف، كيما «لازم تنوض بكري».. شافتها روري واقفة مع غيتارتها وبدات تغنّي حاجة شابة بزاف.. حاجة عمُرها قُرون.. حاجة جاية من الأندلس..  «حرّمتُ بيك نُعاسي» بصّح ما بداتهاش من الأول، دخلت بـ «وسال دمع كاسي» وموراها «بتُّ بلا طعام».. بصح كيما قالت روري، ما نسحقوهُمش يباتوا بلا طعام على جالنا، يكفينا اللّي راهم يباتوا بلا سقف برّا.

إضافة تعليق

تعليق (تعليقات)

شاهد أيضاً

مع نورالدين عبّة.. في رحلة الشّعر والمسرح والحياة

بتاريخ 9 مارس 1979، نشر الصّحافي والقاصّ مرزاق بقطاش(1945)، في صحيفة «المجاهد الأسبوعي»، مقابلة، نظنّها …

الدّمية «باربي» تلبس الحجاب؟!

باربي، هي واحدة من أكثر الدّمى شهرة، في العالم، بيعت منها أكثر من مليار ونصف …

اترك تعليقاً

لن يتم نشر عنوان بريدك الإلكتروني.