الجمعة، 3 ديسمبر 2021

خمس صفات للحلاّب

خمس صفات للحلاّب
خمس صفات للحلاّب

التْحلاب اليوم ما ولاّش معايرة، ولا تمسخير، ولى واجب وطني، كيما هو كيما الخدمة العسكرية، بصح عكس الخدمة العسكرية اللّي بلا بيها ما تتزوجش، تقدرما تكونش حلاّب وتتزوج ودير واش حبّيت.. التْحلاب تطوّر بحاجات بزاف اليوم: الفايسبوك، السمارت فون ولانساج ودراهمه اللّي يروحو يشروا بيهم «إيبيزا» بلونش ناج و«بولو».. الحلابين بكري (الميلك – مان) كانوا مساكن بلا وسائل بلا والو، وكانوا خدامين، من الطاكسيفون للسيبار، كانوا يصرفوا كثر ملّي يدخلوا دراهم، هكّاك وما طلقوش، وشدّوا فالحرفة. اليوم، حنا نحاولوا نصوروا الحلاّب تع الصّح (مَشي تاع بلاستيك) كيفاش لازم يكون، وواش هو دوره في بناء المجتمع.

1 – أخطيك من الغنا تاع اليوم، اللّي يحب يكون حلاّب تاع الصّح يعاود يسمع الشاب جلول (إيه اللّي ولى اليوم الشيخ جلول) عاود اسمعه، من نهار كان يقول: «طرديني معليش… تضربيني معليش… تخليني لالالالاَ! ما نبغيش!».. اسمع مليح واش كان يقول وافهم. بلا ما تنسى أغنية «صغيرة وبلوطة». من بعد تقدر تنوّع شوية زعما الشاب مامي في «الراي سي شيك»، شوية الشاب بلال في «سهيلة».. وهذو تسمعهم باش تدير الخطوة الأولى برك.

2 – لازم تكون تعرف واش معناها «حلاّب»! ملّي كنت صغير وأنت تسمع الكلمة، بصّح عمرك ما فهمتها ولا عرفت مين جات… بصّح ملّي أنت صغير وأنت حاب توّلي حلاّب، تحب يولّو يعيطولك «ميلك – مان».. «يحلّب لبنات» هذي تاع ذراري صغار، هذا مسكين يحب البنات برك، ونورمال يعني. الـ«ميلك –مان» تاع الصّح، عندو بزاف عفايس، مثلاً: يكون قوّاد، ويبيّع كُلّش. يكون شِيّاتْ، يبروسي بلا رحمة..  يعني تقدر تقول الحلاّب اليوم ولاّت عندو خدمة بزاف.

3 – كاين اللّي يقولوا بلّي الحلاّب ما عندوش قلب على خاطر جايح! لالا! عنده قلب الحلاّب مسكين، عنده باركينغ مشِي غير قلب… (أحفظ هذي وديرها شِعار) «الحلاّب يدراقي كل حاجة تبوجي» والحلاّب (زيد أحفظ هذي) يقول كي يكون خارج: «Tu bouge, tu «moute

4 – الـ «ميلك –مان» لازم يحرق صحابه، ولّى يدير بيهم هَدّة، ولّى سمّيها واش حبيت، المُفيد يشوف كي يكون الغاشي، ووين يكونوا بزاف بنات، ويجبد على صحابه، إذا كانوا حلاّبين كيما هو، راهم يروحوا كامل طحاحنة فرحانين، ولّى يتخاسر مع صحابو. بصّح معليش، في خاطر التحلاّب دار بيهم هدّة. إشفى مالا: أحرق صحابك.. أحرق صحابك!

5 – كاين بنات (مَشي قع البنات… مزيّة) سُوسْيَالْ، لو كان ما يصيبوش الحلاّبين يموتوا، مزيّة (إيه مزيّة) كاين الحلاّب الـ«ميلك – مان» يشدّهم على خلق ربّي، يفليكسيلهم، يصرف عليهم، يوصّلهم، يحبهم، يخلّيهم يحبّوه، يخلّيهم يضربوه، يسلفلهم «الإيبيزا» بلونش-ناج تاعو… يعني بالمختصر المُفيد شاد بْلاهم على الغاشي.

هنا نشوفو بلّي الحلاّب اليوم ولّى إنسان خدّام، يجيب شهريته من عند الدولة، الدولة تخلّص باش يقوم بواجبه. البطل «ميلك – مان» في سيارته الإيبيزا بلونش ناج، يتجوّل فالشوارع ويحوّس على الأشرار والشرّيرات. وكي يطيح البترول ويخسروا جماعة غينيا «تروبيكال» تمسحله الدولة الديون. وتزيد تعطيلو لانساج باش يجيب إيفوك (علاش لالا؟) باش يحلّب مليح، ولازم المجتمع يتقبّل الخدمة هذي، واللّي كان يحلّب فالحومة غدوة بالاك يحلّب فالحكو…

إضافة تعليق

تعليق (تعليقات)

شاهد أيضاً

عزم

عقدنا «العزم» أن نضحك عليكم

بينما كان الشّعب يخرج، كلّ جمعة، في حراك غير مسبوق، من أجل دولة جديدة، تحترم …

جورنال: أسبوع أوّل في الحجر الصّحي

كريمة أ.نواصر أسبوع من الجهاد في سبيل الحياة، بين أربعة جدران، اكتفيت فيه بعدّ السّاعات …

اترك تعليقاً

لن يتم نشر عنوان بريدك الإلكتروني.